Nachruf auf Heiri Schmocker

Verfasst und am 12.3.2019 an der Abdankungsfeier in der Kirche Safenwil verlesen, von Walter Gräub

Schmocker Heiri 1927-1919

 

Wärti Awäsendi, liebi Gäscht

Mer händ am 3. März müesse Abschied nä vom Heiri Schmocker. Ich be agfrogt worde vo de Söhn Fredy und Michael Schmocker, ob ich zum bruefliche Teil vom Heiri es paar Wort i de Chele be de Abdankig würdi säge. Das hani gärn gmacht.

 

E grosse Teil vo euch het de Heiri jo persönlich kennt. Drum möchti ehn a dere Stell nomol churz ufläbe lo. De Heiri esch mer sehr noch gschtande. Er isch für mech en Fründ, Förderer, Lehrmeischter, Lehrer, Pionier und Motivator xi. Zämefassend de Heiri esch en Undernähmer und Underhalter xi i jeder Beziehig. Min erschti Kontakt mit em Heiri goht is Johr 1960 zrugg. Ich be denn 15 xi und i de Lehr be de Walter Steinmann AG, wo är technische Betriebsleiter xi esch und au min Lehrmeischter. Us- und Witerbildig send am Heiri uf sini Läbesfahne gschrebe xi. Scho Mitti 50-er Johr het de Heiri mit Bruefskollege xeh, dass im Kanton Aargau öpis muess undernoh wärde i de Bruefsbildig vom Carrosseriegwärb. Vom Amt für „Bruefsbildig“ vom Kanton und de Bruefsschuel Zofige händ si Understützig becho. De Heiri esch die tribendi Chraft xi und är het de roti Fade i de Hand bhalte. Mit sehr 1 grossem Engagement und vel Zitopfer het är d Vorbereitige troffe zur Gründig vo de Aargauische Vereinigung zur Förderung der Berufsbildung Carrosserie-Gewerbe, churz AVBC. 31 Carrossieundernähmer sind a dere Gründigsversammlig vom 22. Mai 1965 debi xi. I dere Vereinigung het de Heiri sich au zur Verfüegig gschtellt als Präsident vo 1965 bis 1978. Sin unermüdliche Isatz, sis Wüsse und sini Zueverlässigkeit händ es tragends Netz lo entstoh. Sini Fachkompetänz und sini zeichnerische Fähigkeite het är am Beschte als Fachlehrer vo angehende Carrosseriefachlüt chöne witergä.

 

Am Afang het är d Lehr tätigkeit im Näbeamt usgfüehrt. Spöter denn het de Heiri nur no als Lehrer unterrichtet und zwar in Zofingen, Liestal und Sissach. Zäme mit em Seiler Franz händ die beide Grundlage erarbeitet für Meischter- und Ifüehrigskurs. Bis zu siner Pensionierig het de Heiri underrichtet. Wievel 100 Lehrlinge de Heiri underrichtet het, entzieht sich miner Kenntnis, aber es dürfte es paar Hundert xi si. Wenn me hüt no under Bruefskollege zämestoht, und öper frogt: „Besch au no zum Schmocker Heiri id Schuel?“ Denn lösts es zfrednigs Lächle us mit „Jä jo...“ Vel kenne sini Sprüch us de Schuel...“So chömid miner Herre, jetzt müesse mer weder schaffe, fertig gschnurret...oder s Bild vom Heiri bem Korrigiere vo de Zeichnige hinderem Bürotisch, d 2 Läsibrülle uf em Nasespitz mit em Spruch: „Neeei, das gloubi ned!!!“ De Schmocker Heiri esch beliebt und gachtet xi. Är het en xunde Humor gha, het lo diskutiere, mängisch fasch e chli z lang, är esch e Lehrer xi mit Härzbluet, Liib und Seel.

 

De Heiri esch im Carrosseriegwärb au nach siner Präsidialzit witerhin sehr noch gschtande. Är esch de Übervater blibe vo eusem Verband, wo 1978 umtauft worde esch zum Aargauische Carrosserieverband, abgchürzt ACV. Jede nachvollgendi Präsident het i jeder Beziehig und Situation vom Heiri Understützig becho. Är esch au s Verbindigsglied xi zwüsche Schuel und Gwärb. Ich erinnere mi sehr gärn a Generalversammlige oder gmeinsami Sitzige und Zämekünft zrugg. Am Schluss, wenns guet gloffe esch, und me ne gfrogt het: „Du Heiri, heschs Örgeli debi?“ Wenns ehm passt het, het ärs gholt, Taschtatur mit Salatöl igschmieret, und rund esches gloffe. De Ustusch, s Fachsimple, Gselligkeit under Glichgsennte z diskutiere het für de Heiri en höche Stellewärt gha. Au während siner spötere, no aktive Zit. Die ALTE GARDE vo de BBK, Bruefs-Prüefigskommission vom VSCI, die Fründschafte het är pflegt bes zlescht. Es send „sine“ Manne xi, wo gwüsst händ wies laufe muess.

 

E ganz grossi Freud für ehn esch d „Swiss car Register“ xi, e Organisation, wo Gschecht vom Carrosseriebau us de Afäng sammlet, ufbewahrt und pflegt. Die händ eri Lokalitäte in Safewil gfunde. De Urs Ramseier, wo dere Organisation 3 vorstoht, esch für de Heiri d Rettig xi vo sine gsammlete Wärch us de Carrosserievergangeheit. Allne Interessierte vom Carrosseriegwärb chani en Bsuech i dene Usstelligsrüm wärmschtens empfähle. De Heiri sehr vel Zit ufgwändet für euse Bruefsstand. Für sis Engagement zu Gunschte vo eusem Bruefsstand möchti do a dere Stell ehm im Name vo eus allne nomol ganz härzlich danke.

 

Danke Heiri , Vergälts Gott. 4 

 

Dokumente aus dem Fundus von Heiri Schmocker

Broschüre 30 Jahre Aargauischer Carrosserieverband ACV.
Von Heinrich Schmocker zur Verfügung gestellt.
VSCI Schmocker.pdf
Adobe Acrobat Dokument 23.5 MB